The world is full of polymers…literally and figuratively.

Kahit saan ka yata lumingon may plastik. Hindi ko tinutukoy yung kapitbahay mong laging nakangiti kapag ika’y kaharap. Ang binabanggit kong bagay ay karaniwang gawa sa petrolyo sa pamamagitan ng reaksyon ng mga kemikal. Naging bahagi na ito ng ating pang-araw-araw na buhay dahil karaniwan itong ginagamit na materyal na pambalot o supot. Lalo itong sumikat dahil ito ay mas magaan, mas mura at mas madaling gawin.

Lumang Kultura ng Pamimili

Bago pa nauso ang mga plastik na bag, ang mga tao noon ay namimili at nagdadala ng mga bag na gawa sa tela. Ito ay tinatawag na burlap o hessian at karaniwang yari sa natural na hibla ng halaman gaya ng saluyot, abaka, saging, rattan, kawayan at iba pa.

Sa mga nagdaang dekada, unti-unting napalitan ng plastik ang papel at tela bilang pambalot at bag dahil ito ay mas mura at mas maginhawang gamitin. Ginagamit din ito sa pangagalaga ng mga pagkain at sa pagpapalaki ng mga prutas at mga gulay sa kabila ng

pagdudulot nito ng polusyon sa ating kapaligiran.

Mga Bantang Panganib ng Plastik sa Kalikasan

Marahil alam na rin natin ang mga posibleng masamang epekto sa kalikasan ng plastik. Bukod sa ito’y madumi sa paningin, ang ga-bundok na basura ay maaaring magdulot ng masamang epekto sa kalusugan ng tao, hayop at mga halaman sa pamamagitan ng pagkalat ng mga iba’t-ibang sakit. Ang pagtatapon naman nito sa kanal ay posibleng maging sanhi ng pagbara ng daluyan ng tubig na maaaring magbunga ng mga pagbaha gaya na lamang noong nanalasa ang bagyong Ondoy. Pinapababa rin nito ang antas ng pag-ulan sa lungsod. At ang huli, binabawasan nito ang pagkamayabong ng lupa.

Minsan, nakakain ng ibang hayop ang mga plastik na nagiging sanhi ng kanilang pagkamatay. Gaya na lamang ng mga isda napagkakamalang pagkain ang mga kalat sa dagat o ilog.

Lahat Bawal?

Kailangan bang tuluyang ipagbawal ang plastik? Iyan ang tanong ng karamihan. Sa ngayon, kumu-konsumo ang buong mundo ng humigit-kumulang na 100 milyong tonelada nito. At ang bilang na ito ay patuloy na tumataas dahil na rin sa paglobo ng ating populasyon. Sa Pilipinas, maraming batas ang naipasa ukol sa wastong pangangasiwa ng mga basura ngunit kulang sa ngipin ang pagpapatupad nito.

Mga Batas Laban sa Paggamit ng Plastik

Naipasa ang isang kaukulang batas na kumukontrol sa paggamit ng mga plastik bag sa mga pamilihan. Sa ngayon, hindi bababa sa 20 lungsod ang nagpasa  ng iba’t-ibang uri ng restriksyon sa paggamit ng plastik. Sa buong Metro Manila, kabilang ang mga lungsod ng Quezon, Maynila, Pasig, Marikina, Las Piñas, Muntinlupa, Pasig at Mandaluyong. Mayroon na ring mapa na magpapakita kung saan sa Pilipinas ang nagpapatupad ng pagbabawal ng plastik.

Sa pribadong sector, isa ang grupong EcoWaste Coalition na nanghihikayat sa buong komunidad na isulong ang mga pangmatagalang solusyon sa basura at pagbabago ng klima na kinahaharap ng Pilipinas at ng buong mundo.

Mga Suliranin

Mayroong mga grupo sa industriya ang nagbuklod upang tuligsain ang pagbabawal sa paggamit ng plastik ng mga lokal na pamahalaan. Sinubukan nilang i-anunsyo sa mga pahayagan ang kanilang pagtutol. Kinuwestiyon nila dito ang kredibilidad ng mga bag na gawa sa papel at sinabing “mas maraming ginagamit na tubig sa paggawa ng papel kaysa plastik”. Wika nila, ang isang galong tubig ay nakakagawa lamang ng isang papel na bag habang 116 plastik bag naman ang nabubuo nila. Dumodoble ang emisyon ng karbon dahil kailangang pumutol ng 17 puno para lamang makagawa ng isang toneladang papel. Mas mabigat diumano ng 600% ang basurang dulot ng papel kaysa plastik.

Iginiit pa nila na hindi patas ang pagsisi sa mga plastik bilang sanhi ng kalat at problema sa basura. Dagdag pa ng grupo na nais nilang palawakin ang kamalayan ng taumbayan sa pagbabawal ng plastik. Subalit, bunsod na rin sa pagiging popular ng mga restriksyon sa paggamit ng plastik, minabuti na lamang ng ibang miyembro na suportahan ang batas na nagpapataw ng multa sa mga bag bilang alternatibo.

Nangangamba naman ang mga grupo ng obrero, na bahagi ng industriya ng paggawa ng plastik, na maaaring marami sa kanila ang mawalan ng trabaho dahil sa pagbabawal na ito. Sa kabilang banda, sinang-ayunan naman ng mga grupo ng negosyante at mga may-ari ng mga mall ang naturang mga ordinansa ng iba’t-ibang lokal na pamahalaan.

Ang Kalutasan

Paano nga ba mareresolba ang problemang ito? Para sa akin, ang solusyon ay namamalagi sa:

1.    Mahigpit na pagpapatupad ng batas ng mga kinauukulan at pagkakaroon ng disiplina ng lahat ng mamamayan;

2.    Pagkakaroon ng sapat na edukasyon at kasanayan sa wastong pamamahala ng basura at pagtapon;

3.    Pagtangkilik sa mga alternatibong materyal sa plastik;

4.    Pagkakaroon ng pondo sa pananaliksik at pagtuklas ng mga alternatibong materyal na mas mura at hindi nakakapinsala sa kalikasan;

5.    At ang pagkontrol ng populasyon ng ating bansa.

Bawal na ang plastik! Kaya pala usong-uso na ngayon ang mga epal o mapapel.